Cherine’s Project
كل الفرق اللي جات تيدكس طنطا حالات مختلفة ورائعة بعيدة عن الغناء التقليدي اللي اتعودنا عليه, لكن أنا شخصيا تأثرت جدا بماسكارا ومغنية الفرقة شيرين عمر, مش عشان بس صوتها الرائع وأدائهم المتميز في الأغاني الثلاث اللي قدموها لنا تأثري جه لمشاركتهم الانسانية لقصتهم مع الغناء المحترف ورفض أهاليهم ظهورهم العلني حتي انهم اضطروا للظهور في فيلم ميكروفون بأقنعة ! شاركتنا فرحتهم ان تيدكس طنطا أول مكان تم موافقة أهاليهم علي الظهور فيه بشكل علني, فرحت ان اول غناء لهم كان لجمهور طنطا في ضيافة السيد البدوي
تفاصيل زي دي تشعرك بانسانية اللي قدامك, شرين مش نجمة من عالم تاني مانعرفش عنه حاجة كجمهورعادي, شرين بنت زيها زيي أهلها بيخافوا عليها بيغلسوا عليهافي الخروج أو السفر لوحدها وبتعاني نفس مشاكل أي بنت في مصر تصادف بس ان صوتها جميل
تقدروا تسمعوا ماسكارا علي SoundCloud دوروا علي شيرين بال CH مش بال SH زي ما أكدت علينا و اهربوا معانا دلوقتي لأبعد مكان http://www.youtube.com/watch?v=up-a-00k4u4
Knowledge … Yasmin Madkour
ياسمين بقى هي إللي عملت دايرة لمت فيها الناس .. !
إزاي ..؟
تعالوا نشوف القصة من أولها مع ياسمين :
- لما بيبقى في أكل شكله غريب … بس متقدملك في طبق حلو وبشكل كويس .. ممكن تاكل منه ..؟ .. أكيد آه عشان طريقة تقديمه شدتك … !
المعرفة برضه نفس الحاجة ونفس الفكرة …
- أصلاً المعرفة مش كتب بس … !
- ففكرت أعمل ( لمه ) …
( وهي إيه اللمه دي ..؟! )
- إن إحنا نقعد في دايرة نتكلم في موضوع أياً كان سياسي .. اجتماعي إن شاء الله حتى عن توم وجيري .. !
في اللمة واحد إللي بيتكلم و محدش بيقاطع حد ولكل واحد ليه وقت محدد .. وبعد كده بتبقى في أسئلة و بنجاوب على بعض …
- في اللمة كلنا زي بعض .. أصلاً الإختلاف مش في الاشخاص .. الإختلاف في الأفكار ..
- اللمة دايماً بتبقى في مكان أثري او عام وليها معاد ثابت و دوري و بيبقى إختيار الموضوع فيها بالتصويت بعد جمع الإقتراحات …
عارفين .. !
- اللمة بدأت بـ 4 أشخاص بس … و مكناش حاطين في بالنا إنها ممكن بعد كده عددنا يزيد ونوصل في يوم من الايام لـ 700 شخص في مكان واحد .. !!
- و بعد مكانت لمة مصرية بحتة بقت لمة عربية بتضم جنسيات عربية تانية
- و بعد مكانت لمة باللغة العربية بس .. بقت لمة بتتكلم بلغات مختلفة كمان …
- فلو حابين تاكلوا المعرفة .. جربوها بشكل مختلف بعيداً عن الكتب … صدقني إذا عملت كده هتقدر تاكلها .. آه هتقدر .. !
- الفكرة كلها إن إحنا قدمنا المعرفة بطريقة مختلفة … إنت كمان تقدر تعمل ده .. لمة خاصة بيك وبمنطقتك .. جيب 3 أشخاص في معاد ثابت في اي حتة في الشارع و إنطلقوا ..
وإعرف إن المعرفة تقدر تاكلها .. بس المهم إتقدمت في طبق شكله عامل إزاي ..؟ :)
Music & Life … Maha Hafez
مها بنوتة كل خلية فيها بتشع حيوية وطاقة إيجابية …
أول حاجة قالتها لينا : أنا دراستي كانت هندسة كمبيوتر .. بس وفيها إيه لما تبقى دراستي كده وبلعب مزيكا وبغني .. ! … مش عيب إني عايزة أبقى Creative
- طب تعالوا نرجع مع مها لكام سنة ورا كده …
مها وهي من عندها 8 سنوات إكتشفت إنها بتسرح كتير أوي وخاصة في جدتها وفي شكل الناس … وكانت بتحس إن الناس كلها شبه بعض .. فـ بدأت تفكر .. ( طيب هو إيه إللي بيفرق بينهم ..! ) ..
وإكتشفت مها إن كل واحد فينا بيتميّز بـ روحه و بصمته …
و طلّعت من يوميها نظرية البصمة عشان كل واحد فينا يقدر يصنع بصمته الخاصة بيه …
مها بتألف أغانيها ومن هي عندها 8 سنوات.. وكل إللي ألفته ساعتها بتغنيه دلوقتي وهي عندها 23 سنة ! …
- مها شايلة كلمة فاشل من قاموسها وبتقول ( لو حد قالّك إنت فاشل فاشل فاشل .. قولّه آه أنا فاشل وسيبه وكمل مشوارك عادي .. )
- من أهم الحاجات إللي قالتها مها :
- فيها إيه لما و إنتوا في الشغل تلعبوا مزيكا بأي طريقة .. ساعتها هـ تطلعوا افكار أحسن وأكتر ..
- و فيها إيه لما تحط الـ Headphone على ودانك وتمشي في الشارع وتغني أو حتى ترقص .. الناس هـ تشوفك مجنون ..؟ المجنون مش هو إنت المجنون إللي ناسي نفسه ومركز مع الناس .. !
- إيه رأيكوا تكتبوا إنتوا عايزين الدنيا تبقى عاملة إزاي … إكتبوا الـ يوتوبيا بتاعتكوا ..
- وآخر حاجة حركت مشاعرنا بصوتها الرائع وعزف الرائع طارق :)
The power of Art … Mohamed Gaber
نقدر نقول عن محمد جابر إنه فنان من نوع آخر …
إزاي ..؟
محمد كلمنا عن فكرة The Power of Art …
إستشف فكرته منين ..؟
من كتاب إسمه Graphic Agitation
الكتاب ده عبارة عن مجموعة صور و رسومات بتعبّر عن حال الشارع أيام حرب الفيتينام …
- رَسمْ محمد جابر أو الفن إللي عايز يوصله لينا بيحمل رسالة بتقول ” إن في حاجات بايظة كتير لازم نصلّحها ..! “
- فـ بدأ محمد يرسم رسومات بتعبّر عن الشارع المصري
والفن ده إسمه ” فن الشارع ” … وليه في الشارع ..؟ … عشان الناس محتاجة تبدأ تشوف ألوان … لأن القاهرة بقت رمادية أوي … !
ومن أبرز الحاجات إللي قالها محمد :
- إحنا إتحولنا من دولة بتصّنع الفن وتصدره إلى إن الفن ده حرام ( خاصة الفن التشكيلي ) ….
- أنا مش مهتم إني أعرف إذا كان حرام أو حلال … أنا مهتم إن العلاقة بين الفن والمتلقي ترجع زي زمان ..
- وختم بـ : في مصر دلوقتي للأسف ما بقاش في خيال عشان الخيال إتقتل .. فياريت نحاول نحييه من تاني …
Hope
مين فينا مش بيحس بـ إحباط من وقت للتاني ..؟!
مين فينا مش بيحتاج إنه يتخلص من كومة الطاقة السلبية إللي بـ تتراكم جوانا من غير ما نحس ..؟!
إزاي ..؟
بـ ابتسامة تنعشك … بـ كلام مُحفّز وبطريقة غير مُباشرة .. أو تغني مع إللي بـ تحبهم بـ أعلى صوتك…
أو تصرخ وتصقف وتصّفر لـ حد ما تلاقي وشك وإيديك بـ لون الطماطم… :))
أو تكتب أي حاجة جواك في ورقة وتاخد مَشبَك وتعلّقها على حبل غسيل.. !!
أو بـ صورة مع صحابك والفلاش يخبط في عنيك..
آه مـَ تستغربوش .. كل ده تقدر تعيشه مع تيدكس طنطا …
تيدكس طنطا بـ تخليك تبص للـ دنيا بـ شكل تاني … بـ تساعدك تشارك بـ أفكارك وحكاويك مع مُجتمعك بـ الطريقة إللي تحبها…
كل واحد عاش مع تيدكس طنطا لحظة - إن كانت صُغيّرة أو كبيرة - هـ تلاقي إن في حاجة جواه إتغيّرت للأحسن…
وفريق أو خلينا نقول عيلة تيدكس طنطا كل يوم بـ تكبر وحلمها بـ يكبرأكتر … وبـ تعاونا كلنا مع بعض بـ نعلي بلدنا لـ فوق…
وكل فرد في العيلة حط وبيحط طوبة في كيان تيدكس طنطا إللي جمعتنا سوا…
وكل واحد فينا شايف تيدكس طنطا بـ طريقته الخاصة … وحبينا نعبر عن إمتنانا ليها بكام كلمة مننا…
“ تيدكس طنطا .. شكراً عشان وريتي للعالم إن مصر مش بس القاهرة وإسكندرية.. ! “
” شكراً عشان منحتي كل الناس الموهوبة والمبدعة ( في الدلتا ) الفرصة عشان يعرضوا أفكارهم… “
وزي مـَ قالت ( أسماء النهراوي ) ” شكراً تيدكس طنطا عشان دلوقتي كل الناس بدأت تشوف طنطا بـ شكل مُختلف:) ” …
و( محمد جمال ) بـ يقول ” شكراً تيدكس طنطا عشان إديتيني الفرصة إني أشارك في صنع التاريخ:) ” …
أما ( دينا الشيخ ) قالت ” شكراً تيدكس طنطا عشان خليتيني أؤمن بـ نفسي وبـ مهاراتي وإديتيني الفرصة إني أظهر ده … وكمان عرفت إن كلنا عندنا حاجات حلوة محتاجة بس إن حد يكتشفها ويحترمها … شكراً عشان أنا جزء من العيلة دي إللي بتعمل حاجة عظيمة:) ” …
وإتعلمت ( كوثر ) مع تيدكس طنطا إنه مش المفروض تشتكي من بلدك عشان ” إنت بلدك ” .. وإذا عايز حاجة عشان بلدك إعملها … وإذا مش حابب حاجة فيها إبدأ وغيّرها:) …
و ( هدير ) عمرها مـَ هتنسى تأثير تيدكس طنطا على حياتها .. ودايماً هتفتكر الأوقات الحلوة إللي قضيناها سوا:) …
وبـ تقول ( مروة آدم ) ” شكراً أوي عشان آمنتوا بيّا وإديتوني الفرصة إني أكتشف نفسي وأعرف أنا إيه إللي أقدر أعمله .. أنا بجد فخورة إني اكون واحدة من عيلة تيدكس طنطا عشان تيدكس مش مجرد فريق دي بجد عيلة:) ” …
وبكل شغف تقول ( رنا حمدي ) لـ تيدكس طنطا ” إنتِ لعبتي دور أساسي في إن إيماني بنفسي يزيد .. ونبهتيني إني لما أؤمن بـ حلمي مهما كلفني أو مهما وقعني عشان أحققه .. إنه أكيد هيبقى حقيقة في يوم من الأيام:) ” …
وده بالضبط إللي قاله كمان ( خالد صلاح ) بالإضافة إلى إنه إتعلم إن مافيش حاجة إسمها مستحيل:) …
وإتعلمت ( نورا سمير ) في تيدكس طنطا إنه يمكن مش كل فكرة تستحق النشر .. بس كل قصة لازم تتحكي .. وده إللي بدأت تعمله .. تصنع قصتها الخاصة:) …
وبـ تقول ( غادة مدحت ) ” شكراً تيدكس طنطا عشان إنتِ مصدر سعادتي وطاقتي الإيجابية إللي عرفتني إزاي أتعلم من إمبارح وأعيش يومي وأحلم بـ بكره:) “…
وزي مـَ بيقول ( إسلام شعبان ) ” كلنا عندنا أمل إن بكره يبقى أحسن .. و تيدكس طنطا خلتني أنول شرف إني أخلي بكره أحلى:) ” …
وغيرها كتير من الكلمات إللي جوانا كلنا…
في إيه رأيكوا نبدأ نتغيّر ونغيّر مع بعض:) …
